政壇：遊日行山拗佔中 嫻姐險與友割席
工聯會嘅立法會議員陳婉嫻前年去日本旅行，撞正中日釣魚島主權爭議搞出個大頭佛，日前佢同幾個老友飛赴九州浸溫泉、行山，諗住趁立會復會前「梳乎」吓，點知出發日期又撞正「佔中」啟動前夕，加上佔中「佔」出禍，搞到嫻姐難得遊日都冇晒心機，仲差啲與同行友人鬧交玩割席添!
陳婉嫻遠赴九州行山諗住輕鬆吓，點知就佔中問題同友人嘈起來。（受訪者提供）
今次遊日，嫻姐話淨係行山都行足四十多小時，包括九州著名山峰油布岳，但行山時一直對佔中心掛掛，仲破戒同友人辯論佔中。點知同社交網站一樣，一行人對佔中意見分歧，大家都堅持己見，撐佔中同反佔中「陣營」仲嘈起上嚟，嫻姐仲險被要求「離場」搞到割席咁滯，難怪嫻姐慨嘆行山都冇晒心情影相喇。
對於佔中演變成佔領各區，嫻姐擔心若果唔能夠圓滿咁「收科」，將會出現「後佔中」潮，即使警方清場，學生定必再接再厲，每遇零星矛盾即再發起佔領行動，屆時更加家無寧日，所以希望政府同學生珍惜對話機會。
