政壇：莊成鑫自嘲股壇「燈神」
呢排唔單止香港股市受佔領行動影響下跌，連全球嘅股市都呈跌勢，相信一班股民都憂心忡忡。不過，對於香港中華出入口商會會長莊成鑫嚟講，心情就完全冇影響，皆因佢過往買親股票都跌，所以之後都冇再買嘞。佢仲話以前啲朋友成日講笑話如果佢買入或賣出股票時一定要通知大家，等大家有所準備咁話，直情當正佢係股市「燈神」。
莊成鑫今年食咗逾三十隻大閘蟹，但膽固醇竟然無特別高到。
雖然莊成鑫對買股票已冇乜興趣，但對食大閘蟹似乎就好熱衷，閒閒哋一季食幾十隻大閘蟹都唔奇，好似舊年就由九月起食到今年一月，認真誇張。莫非佢唔擔心膽固醇過高影響健康？佢話今年食到第三十隻大閘蟹時去睇家庭醫生，發現膽固醇竟然無特別高到。佢估計應該同佢每朝食大量蔬菜嘅習慣有關。不過，佢最後都係叫醫生開啲降膽固醇藥「打定底」。
佢又話食菜嘅習慣係源於一、兩年前醫生建議佢減肥，當時醫生叫佢食清淡啲，佢就駁嘴話自己多應酬，醫生就窒番佢話︰「早餐冇應酬喇啩！」佢先乖乖哋朝早戒粥食青菜，終於減咗二十磅咁多。
