佔領運動喺上月底發起後，警方同消防處每日都召開記者會，講解警方行動、道路阻塞情況同救護服務數據，輿論效果都算唔錯，其中警察公共關係科總警司「許sir」許鎮德更加走紅咗。點知政府有樣學樣，幾日後由民政事務局副局長Florence許曉暉牽頭，搞個跨部門記招交代佔領行動而令民生受損嘅情況。可惜Florence人氣遠不及許sir，最終喺尋日宣布記招「壽終正寢」。

許鎮德

許曉暉（左）牽頭的跨部門記招，昨日起暫別觀眾。

話說許sir開記招成日都有金句，好似「或者我再重申一次」、「I will now recap in English」等，一班網民就調侃佢，仲幫記招三人喺社交網站分設「四點鐘許sir」、「（交通）李sir馬路的事」同「（救護）梁sir陪你談數據」專頁，就算有玩嘢成分，都算係有人氣。

不過，Florence帶同運輸署、醫管局、行政署同民政專員個記招就有天壤之別，或者佢哋比較謹慎，冇乜金句，輿論就少好多關注，每日記者愈來愈少，呢幾日仲要開咗唔夠十五分鐘就收工，所以佢尋日無奈話「有需要會再重開」，就正式暫別各位喇！

第一手消息請下載on.cc東網iPhone/iPad/Android/Windows Phone Apps