政壇：樹根「四處都瓜」諷佔中
對中英文雙語別有一番「研究」嘅立法會議員「樹根」鍾樹根，繼自創成語「子烏虛有」等驚人語錄後，尋日趁立法會續會發言再獻新猷，諷刺「佔中」所謂「遍地開花」實際上係「四處都瓜」。樹根鬧爆佔中由屯門到柴灣都唔受歡迎，暗示有人「充當帝國主義嘅走狗」，其中反對派同壹傳媒老闆肥佬黎更牽涉政治捐款醜聞，佔中注定失敗，反對派就面對被出賣咁話。
鍾樹根
直至昨午財務委員會會議，人民力量「大舊」陳偉業引述網民形容樹根係「蠢樹根」，激到樹根彈起指言論冒犯，要求收回，仲反問「我點蠢法？」難得大舊願意解開樹根疑團，死撐樹根係死物，冇感覺嘅，仲趁離開會議廳時高叫「人蠢冇藥醫」，激到樹根反擊大叫「吔蕉！」樹根係咪「蠢樹根」好難定奪，但「肯定」好多議員已經變晒小學雞，主席主持會議認真難頂。
