政壇：徐子淇爸爸湊6孫為樂
嫁畀恒基地產副主席李家誠嘅「千億新抱」徐子淇，婚後速添三子女，家庭幸福美滿。早前身心美慈善基金（下稱基金）喺屯門舉行長者盆菜宴，徐子淇嘅爸爸、金至尊珠寶副董事長Alex徐傳順都有到場，佢講起囡囡就笑不攏嘴，話成日去探望三個外孫BB，最細嘅BB仔話咁快已三歲幾。咁徐子淇仲追唔追第四個BB呢？Alex諗咗幾秒鐘，笑笑口話唔知喎！Alex講起湊孫就勁開心，自爆佢嘅細女同樣已生咗三個BB，所以佢加埋共有六個外孫，名副其實係兒孫滿堂。
徐傳順（右）同老拍檔黃英豪（左）抽空入屯門與一眾長者同樂。
香港資源主席Kennedy黃英豪啱啱喺台灣返港，都趕到場支持。Kennedy話台灣朋友好關心香港佔領行動，仲笑稱佔領同台灣早前發生嘅太陽花學運好相似。當時太陽花學運佔領立法院二十三日，香港佔領行動亦佔領咗二十日，佢希望政府同學生快啲傾掂數，唔好再虛耗落去。
