立法會議員個人利益監察委員會(CMI)原本喺上星期開會,調查五位泛民主派議員涉嫌收取壹傳媒老闆肥佬黎秘密捐款而無申報嘅醜聞,但受佔領行動影響,立法會秘書處要取消多個會議,包括CMI。CMI原本會喺下周一開會,但又因為部分委員唔喺香港而要再押後會議,經過多番協調,終於鐵定喺本月二十八號召開本年度首次會議,開始調查議員涉及政治捐款醜聞。

設計圖片及對白

無申利益護《蘋果》

立法會休會期間,有一批機密檔案顯示肥佬黎於一二年先後疑向多個泛民政團及核心人物合共捐款逾四千萬元,當中包括工黨李卓人、社民連「長毛」梁國雄、公文袋「袋巾傑」梁家傑同「阿毛」毛孟靜、白鴿黨涂謹申五名現任立法會議員,有人更加公然喺立法會大會辯論有關《捍衞新聞自由》動議時,發表維護《蘋果日報》嘅言論,但就無按立法會規定喺發言前主動申報利益。其中袋巾傑、阿毛同涂謹申否認收過錢。

唔少團體之後去廉政公署舉報五位議員涉收取「政治黑金」,工聯會五名議員仲去信CMI主席葉國謙要求召開會議,調查五位泛民議員有冇違反立法會議員申報利益規定。葉透露,由於政治捐款醜聞事件引起廣泛關注,委員會原本諗住愈早開會愈好,但當佢初步定出下周一呢個開會時間後,副主席「卿姐」劉慧卿就同佢講話要去瑞士日內瓦出席聯合國人權組織會議,講述香港嘅佔領行動,同埋警方喺處理集會中嘅手法。

燒到埋身走唔甩

除咗卿姐唔得閒開會外,有委員又以當日有其他會要開為由要求另定日子開會,逼住再次將個閉門會議押後到月底舉行,話希望到時開得成喎!雖然一再拖延,但班泛民議員咪開心得太早,事關只要CMI一開會,涉及政治捐款醜聞嘅一眾議員將會避無可避,要面對立法會公平公正嘅調查。

第一手消息請下載on.cc東網iPhone/iPad/Android/Windows Phone Apps