城中鏡：張樹槐跑芝馬「星級待遇」
好多人都話喺外地參加馬拉松氣氛好過香港好多，早兩日恒生銀行傳訊及可持續發展總監Walter張樹槐，參加完美國芝加哥全馬賽事，聽佢描述又真係好好玩。
張樹槐上周日完成芝加哥馬拉松，獲「星級」打氣。
芝加哥馬拉松係「世界六大」之一，今次賽事吸引嚟自全球一百個國家和地區約七萬一千人報名，其中四萬五千人獲參賽資格，據講芝加哥每年藉舉辦全馬賽事所帶來嘅經濟效益達港幣二十億元之多，仲唔係「丁財兩旺」！
賽道環繞市內包括唐人街嘅二十九個區，約有一百七十萬民眾夾道打氣，有人「夾band」助興，喺唐人街亦有華人打鼓支持，賽事當日可以話係全城參與。Walter倣效其他跑手喺T恤上寫上自己個名，邊跑邊聽到好多人激動咁高呼跑手名字，Walter就聽到：「Walter, I have been waiting for you!」、「 Walter, you are doing great!」呢個moment，十足「粉絲」守候歌星或明星。喺跑至終點時，大會更透過廣播，宣布每名跑手嘅名字以作表揚。
