葉劉淑儀前晚離開立法會時被十幾個示威者追鬧。
佔領行動示威者持續包圍立法會大樓，唔少議員出入時都要行經佔領區，有建制派議員除咗要兜路返立會外，更加經常被示威者「問候」。議員葉劉淑儀前晚離開立法會時就被十幾個示威者追鬧，有人仲鬧埋佢個囡囡，認真慘情。葉劉話經過前晚一役後，佢每日都會帶埋把雨傘返立會開會，見到示威者意圖向佢潑腐蝕性液體時，可以即刻開遮擋住，確保花容不受損害。
何俊賢尋日經海富天橋行返立法會，但因為示威要改行添馬公園。
餐廳職員送早餐到立法會，但遇上封路行唔過。
外賣送唔到搵救兵
漁農界議員「高佬賢」何俊賢尋日諗住經海富中心天橋經政府總部方向行返立會，但被堵路示威者拒絕放行，惟有掉頭轉行添馬公園過立會。高佬賢話雖然封路為佢帶來不便，但只要唔係日日都係咁，間唔中兜吓路都冇乜所謂喎。
過去每逢立會續會，主席都會請議員食早餐，但尋日嘅早餐差啲就送唔到去立會。話說尋日朝早八點幾鐘，當三個餐廳職員好似平時咁將啲外賣送去立會嗰陣，就遇上政府總部東翼前地關閉而過唔到立會，一時之間搞到個職員唔知點算，惟有打電話搵救兵幫手解圍，隔咗陣先喺立會職員帶領下兜路沿示威區行入立會。
民政事務局常任秘書長馮程淑儀尋日返工時都被大批傳媒包圍，問政府有無評論過佔領行動幾時會結束，又問點睇特首取消立會答問大會等，佢就以「已經講過」為由不作評論，之後就微笑行入政府總部。
第一手消息請下載on.cc東網
