設計圖片及對白
早喺上屆立法會，幾個單打獨鬥嘅建制派功能界別議員已開始組成「五散人」，方便處理立會事務同研究各項議題。不過，自從陳茂波唔做會計界議員走去做發展局局長，變成「四散人」後，工業界林大輝又經常同政府對着幹，明顯同其他散人唔多「啱key」，搞到「四散人」幾乎要解散，而喺今個會期有個「六散人」聯盟成立，但就飛走大輝同醫學界「怪醫」梁家騮。
「六散人」由商界議員廖長江任召集人，成員包括旅遊界姚思榮、保險界陳健波、金融界「星爺」吳亮星；建築、測量及都市規劃界Tony謝偉銓；體育、演藝、文化及出版界馬逢國。
話說前年立會選舉結束後，建制派出現一輪獨立議員爭奪戰，廖長江、姚思榮、星爺、馬逢國四人組成「中字派」，而陳健波、Tony、大輝同怪醫就組成新一代「四散人」。不過，隨着大輝同眾人愈行愈遠，加上怪醫周不時因為要去搵真銀而冇開會，搞到剩下嘅陳健波、Tony同「中字派」愈行愈近。
激進泛民喺今年四月就財政預算案發起「拉布」戰，期間仲要不停響鐘要求點算法定人數，令成班建制派疲於奔命。由於大輝同怪醫兩人成日神龍見首不見尾，唔肯幫手輪班坐鎮防流會，搞到其他盟友要輪埋佢哋嗰份。有見及此，「中字派」就同陳健波、Tony一拍即合，決定組成「六散人」聯盟，每逢星期五開會交流下周開會議題及投票取向，但毋須綑綁投票。
另外，財務委員會喺上個會期通過中止待續廚餘回收中心嘅十五億元撥款申請，財委會今日會再次討論。不過，由於財委會主席張宇人喺上次討論時講過有份從事廚餘回收生意，為咗避免出現利益衝突，佢決定由陳健波暫代主席一職。
第一手消息請下載on.cc東網
