因為佔領行動示威者堵路影響，馬時亨近期都轉搭地鐵。
冇做官好耐嘅商務及經濟發展局前局長「肥亨」馬時亨，仍對社會時事瞭如指掌，但佔領行動爆發以嚟，未見佢評論過，只係話喺適當時候先再講。咁啱尋日喺金鐘太古廣場撞到肥亨，唔知係咪因為鄰近佔領核心地區，佢終於開金口，仲以「心痛、擔心、憂心」表達對佔領行動嘅睇法。
肥亨解釋三個「心」嘅深層意義，佢話見到社會因佔領而撕裂，感到好心痛。佢又擔心佔領情況會惡化，唔知會否演變為流血事件。咁佢又憂心啲乜嘢呢？「國家畀咗好大自由香港，依家搞成咁，國家會好失望，仲可能會收緊自由度添！」肥亨又話佔領影響本港經濟，好多小店因為佔領冇晒生意，唔少仲執笠添，遲啲可能會爆發失業潮。
佢又借自己做例子，話早前約咗朋友在中環食飯，最後受佔領影響而取消咗訂枱。佢話港島交通要道被人佔領堵塞，造成好大混亂，部分朋友因為咁而嚟唔到，相信好多人都感同身受咁話喎。講開交通，近期唔少人都因佔領行動而改變咗搭車習慣，肥亨都唔例外，仲話「坐（私家）車都唔知要等到幾時先到！」
第一手消息請下載on.cc東網
