設計圖片及對白
話說「星之子」陳易希當年憑一項發明，獲美國一間大學用佢姓名命名小行星，後來更獲科技大學破格取錄入讀電子及計算機工程學士課程。轉眼間，陳易希畢咗業幾年，佢同朋友合資開辦嘅應用程式開發公司亦已經營運咗三年。尋日陳易希現身港鐵香港站，見佢食食吓飯都要走出嚟講電話，唔怪得佢話生意幾好喇！不過，問到呢期最熱門嘅話題佔領行動，陳易希就支吾以對，竟然要由身邊嘅女性朋友代為解圍。
現年二十五歲嘅陳易希，由當年赴美參加比賽獲獎，到入讀科大至畢業，搖身一變成為今日嘅生意人，眨眼間已經十年。尋日下晝四點鐘，陳易希以一身輕鬆打扮現身香港站，記者見佢傾電話傾咗幾分鐘，然後走番入附近一間壽司店同朋友食飯，期間有講有笑，直至五點鐘左右，一行人合共五男兩女施施然離開。陳易希話，同行嘅都係朋友、同事。問到由佢同朋友創立嘅公司生意點，佢笑笑口話經營咗三年，生意算係唔錯。
記者問題友人答
近期佔領行動成為全球關注嘅議題，喺香港，無論男女老幼都非常關心，但當記者問到陳易希有冇參加佔中時，佢只係好簡短咁答咗「冇」，然後身邊一位着花裙嘅女士好主動咁搶答。陳易希呢位女性朋友表明唔支持佔中，「我哋反佔中o架，做生意嘅只希望香港繁榮穩定！」
記者繼續追問陳易希點睇，點知佢朋友繼續搶答，話「（佢）唔會答o架，冇政治立場！」最後陳易希以趕住開會為理由，講咗聲再見就走咗啦，佢另一位同事就留低張卡片。
第一手消息請下載on.cc東網
