部分原甲組籃球員及藝人組成一隊籃球隊，打算行善及推動籃球活動。
慈善之風吹向各行各業，體育組織都不遑多讓。由本地一啲甲組或前甲組球員夥拍藝人組成嘅籃球隊組班成功，選擇用「Raiders」，（突襲者）做籃球隊嘅大名。佢哋話，隊波前後籌備咗半年，組班嘅目的係一班志同道合嘅人可以做吓社區或慈善工作，嚟緊都打算落學校同社區中心做表演之類，咁樣，既可以推動籃球運動，又可以令一班籃球熱愛者繼續發光發熱。
籃球隊幾個矚目成員，左起分別為Bro5成員喇英、歌手陳柏宇、趙勁皓及啦啦隊負責人盧頌之。
有份組隊嘅趙勁皓（King)話，佢中學時代已經係校隊成員，其後曾代表港隊，前後打咗七年甲組波，上年才退下火線，暫別球場嘅佢話：「我唔想放棄，就同打籃球嘅師兄一齊搞隊籃球隊。」
佢仲活用人脈關係，搵咗同為娛樂圈發展嘅陳柏宇、李逸朗同喇英幫手，各人亦有分工，唔係個個都負責落場打籃球，有人希望自己嘅知名度可以幫到球隊，有人就話會幫手做宣傳，希望對個球隊有一定幫助啦。
有明星足球隊影子
有人話，呢個籃球隊好有當年明星足球隊嘅影子，八十年代成立嘅明星足球隊同樣有曾經代表港隊踢過波嘅尹志強組班，呢種半職業半名人嘅組合，吸引不少市民，搞嘅籌款活動、表演賽都有不俗反應，依家一班後生搞個籃球隊，為慈善嘅目的都有繼承之風o架。
好多知名籃球隊都唔少得一隊性感美麗嘅啦啦隊，突襲者又點呢？據講，佢哋都會有，第時佢哋打街場真係可以吸引唔少觀眾噃。
第一手消息請下載on.cc東網
