政壇：搞搞政：郭琳廣漏夜發聲明 話會跟進監警投訴

據了解，佔領行動持續至今，監警會已經收到近五百宗對警方嘅投訴個案，一班監警會委員面對咁大量嘅投訴個案，頭都痕埋，加上呢兩日仲有示威者涉嫌被多名警員毆打事件，不論政治立場係左、中、右嘅監警會成員都好關注，聞說就連建制派嘅成員、大律師馬恩國都話要嚴肅處理。有成員更認為應該召開特別會議去商討點樣處理投訴，不過，呢段時間就搵人難，泛民主派立法會議員梁繼昌同黃碧雲，尋日就向郭琳廣同全體監警會成員發出公開信，要求郭琳廣立即召開緊急會議，並邀請埋警方代表出席。

為保公正暫拒評論

呢個「通緝令」一出，郭琳廣冇耐就發聲明，話監警會已知悉毆打嘅相關投訴，為咗日後該會審核有關投訴個案時嘅公正性，暫不宜作任何評論。佢又話，該會一直有密切留意佔領行動嘅事態發展，並將所有由佔領行動衍生嘅投訴個案，交由嚴重投訴個案委員會跟進喎。至於點解班成員搵唔到佢，佢就無交代喇。