莫乃光喺會議廳內戴起黃絲帶。
立法會尋日舉行新一年度首次會議，建制派同泛民主派議員出席會議時，分別喺身上掛上象徵支持警方嚴正執法嘅「藍絲帶」，以及支持示威者和平集會嘅「黃絲帶」，齊齊諗住透過衣着博出鏡。不過，最搶眼依然係議員蔣麗芸（阿Ann）。
蔣麗芸身着一件淺藍色套裝，以示支持警方嚴正執法。
一直支持警方依法處理佔領示威行動嘅阿Ann，更着件淺藍色套裝，心口佩戴一條藍絲帶，非常搶眼。
阿Ann話，香港警察嘅質素冠絕全世界，但集會人士連日對警察惡言相向，令佢哋備受壓力。佢覺得示威者唔應該做出挑釁行為，亦唔應該打擊警方士氣，所以尋日特登用實際行動支持警方繼續執法。建制派男議員就有啲打埋藍色呔支持警方，包括旅遊界姚思榮、陳克勤等。
另一邊嘅泛民主派議員如莫乃光等，就着黑衫佩戴黃絲帶示人，泛民主派原本想開會前喺會議廳內打開黃色遮，後因應有警員涉毆打示威者嘅事件，就將開遮行動改為記者招待會，最後得番人民力量陳志全同陳偉業攞把黃色遮入會議廳，成功搶鏡喇。
第一手消息請下載on.cc東網
