政總車道被封，徐英偉工作嘅樓層缺水，佢只好以可樂解渴。（受訪者提供）
佔領行動示威者連日佔領通往金鐘政府總部嘅車道，令政府車輛無法出入，甚至有局長級座駕去到門前都失敗而還。原來，冇車出入真係影響好大，民政事務局政治助理徐英偉（Caspar）就自爆佢哋寫字樓水機連日因為無得換水，搞到成層樓啲同事都無水飲，佢仲話，因為唔想日日買水，所以只好飲可樂解渴喎。
公僕自備所需返工
政府總部內有三千個公務員辦公，依家車道用唔到，好多用開樽裝水嘅部門就艱難喇，缺水問題困擾唔少公務員，Caspar都係其中一員，究竟邊啲部門最缺水呢？冇人透露，但政總中人呢輪就唔少都要自備所需返工，否則，或者就要好似Caspar咁，以汽水當水飲，但可樂飲得多會致肥噃，Caspar唔驚政府車道被佔領，佢嘅身體都多咗脂肪佔領咩？
第一手消息請下載on.cc東網
