政壇：港府投標箱急遷北角
佔領行動已經持續十九天，金鐘政府總部嘅車路至今仲畀示威者佔領緊，公務員雖可以返到工，但內部亂晒龍，佢哋都係有苦自己知。行政署署長蔡潔如日前多次呼籲佔領者讓出車道，仲話已有七百架次嘅車輛出入受阻，但冇人睬佢。無奈之下，佢哋惟有盡量減少原本由政總提供嘅服務，尋日就宣布，政總原先嘅接收投標書箱，即時起改移去北角，減少車道被封引起嘅不便。
設計圖片及對白
財經事務及庫務局尋日宣布，原本投放於政府總部嘅投標箱需要搬位，由於政總大樓要實施特別嘅進出安排，投標人士需將標書改投去北角渣華道北角政府合署地下政府物流服務署投標箱，呢個決定嚟得好突然，政府之前遲遲唔宣布，睇怕係樂觀估計佔領事件好快有轉機，點知前晚龍和道衝擊再起，佢哋嘅內部評估應該唔同咗，所以尋日拿拿聲宣布將投標箱暫時搬離。財經局嘅通告仲話，呢項特別安排即時生效，直至另行通告為止喎。
蔡潔如早前話過，佔領行動兩個禮拜時，政府總部已經受到好大影響，原本要舉行嘅一百個會議，其中已經有四十場會議要取消、押後或改去其他地方，車路遲遲不通，政府總部嘅文件車、貨物車出入都好唔方便。
改動突然 財局提示
據了解，一般要去政總投放嘅標書，都唔會係租個停車場、投個學校餐廳嗰啲，過去嘅例子係相對重要同大額嘅招標工程，或者係咁，以前有啲投標人去入標書時都好大陣仗，有啲標書有模型，有啲或因為標書內容太緊要，甚至要搵專人保護送達添。依家政總條車路唔通，行路去政府總部入標真係唔方便，或者驚仲有額外風險啩，所以，政府惟有移船就磡嘞。
今次改動好突然，估計唔少公司同投標人都會受影響，財經局尋日都特別叮囑，投標人要小心安排赴北角投標嘅時間，仲強調逾期遞交嘅標書係唔會受理嘅。
