政治，一直是有不可預計的怪異，例如學聯與香港政府高層對話，突然間政府單方面嗌停。

既然「官民對話」是解決這劑佔領運動的首要第一步，好心香港廢柴政府就認真處理吧！因乜事出爾反爾，好似細路仔一聲唔玩就推冧啲玩具呢？不過呢啲咁嘅「對話」，真係唔對好過對，先先不能派兩件乞人憎無人緣無誠信的粉皮搞籌備安排啦！講乜春「政制發展憲制基礎」同「法律規定」呀！全球都知道，家陣，呢劑政治爭端，又怎會係香港廢柴政府任何一個官員能做到最終決定的吖！頂多係個「政治演員」和「帶信人」角色，仲擺官腔講憲制基礎和法律常識，唔係白癡，就係有心嬉戲學生啫！嗱！仲有，那件身負「禮義恥」背景的庸官代表開記招氹學聯，被學生代表反駁兼揭發呢件哨牙仔「玩花招」和「搞分化」。當兩方各說各話時，你會信邊個呢？

其實，香港廢柴庸官使乜搞咁多嘢吖？學聯指明要見的係「林鄭」；她曾單拖到「皇后碼頭」，以一敵百，舌戰群雄，除學生仔外，仲有專家學者，咪一樣「考試」過關，跳級升官，除多了一個「好打得」之綽號外，碼頭咪照樣拆鬼咗！

事實上，若林鄭呢次再淡淡定咁「解決」回歸以來香港最大的政治問題，肯定功德無量，為阿爺紓困也！

問題係，好明顯有好多人特登搞是搞非，想香港愈亂愈好，依家，「佔領運動」遍地開花，阿爺最不想見到的，並非開花到上水，而係到上海，也不是北角，而係北京呀！所以，應要立刻盡快「驅散」群眾，才是首要任務。

與此同時，學生與民眾皆知道要達成爭取到真普選的抗爭初衷，必定要人多捍衞各「示威區」，增大學生代表的談判籌碼，因人少就無力的！咁形勢下，要看北京的政治智慧了！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps