佔領中環行動持續十多日，警方首日施放數十枚催淚彈驅散惹來爭議，泛民主派議員「單雞」單仲偕同郭家麒密謀喺立法會復會後以呈請書方式，成立無傳召權力嘅專責委員會調查警方施放催淚彈一事，不過原來二人拖咗好耐至近日先提交呈請書，旋即畀建制派議員爭相截胡，先有建仔「譚sir」譚耀宗搶先提交呈請書擴闊調查範圍，商界議員林健鋒隨後接力亮出被視為「尚方寶劍」嘅《立法會（權力及特權）條例》，要求內務委員會成立調查委員會，調查佔中影響同前因後果。

設計圖片及對白

譚sir接受查詢時證實，前晚已向立會秘書處提交呈請書，要求成立專委會調查佔中起因、演變及政府處理手法等議題。佢解釋，泛民嘅呈請書只係要求調查警方喺處理示威集會嘅手法，唔可以全面了解整個事件，於是決定另外成立一個專委會，又話唔擔心兩個專委會職能同工作會有重疊。

既然泛民同建制派代表都出動呈請書要求成立專委會，前者更係最早提出提交呈請書一方，不過反而主動權喺建制一方，事關譚sir早喺前晚已經交咗呈請書，單雞尋日朝早先交，所以建制派成立專委會嘅要求會排喺泛民前面，加上《議事規則》規定同一時期只可以有一個專委會，換言之建制派一旦成功成立專委會，泛民至少就要等足大半年，先有機會調查佢哋最關注嘅議題嘞。

林健鋒：傳召三子肥佬黎

此外，林健鋒進一步去信內會，要求喺今日會議討論係咪動用特權法成立調查委員會，調查佔中嘅組織策劃、資金來源、引起嘅公眾秩序同安全等問題。

林健鋒又事先張揚話基於有傳召證人嘅權力，到時可傳召佔中三子、壹傳媒老闆肥佬黎等人上立法會問話，相信一定可以搵出佔中嘅幕後黑手。

話時話，單雞等人由主動變被動，又慘被譚sir同林健鋒左右夾擊截胡，只可以怨自己太過「老定」，依家真係喊都無謂嘞！

第一手消息請下載on.cc東網iPhone/iPad/Android/Windows Phone Apps