郭偉強（右）為增加人氣舉動多多，早前曾踩單車推銷喺南區興建單車徑。（資料圖片）
傳聞工聯會立法會勞工界議員郭偉強，被內定下屆立會選舉由功能界別轉戰港島地區直選，接替該會資深議員王國興，而要升呢擔大旗知名度必不可少，郭偉強最新一招就係大打溫情牌，喺最新工作報告中疑借佢嘅華仁師兄、歌手李克勤「過橋」，乘機訴說自己嘅北角情懷。
郭偉強最新工作報告名為「同里有親、和富家書」，主要係匯報過去嘅各項工作，最吸引眼球係寫畀北角街坊同朋友嘅序言，主動提到早前聽到李克勤主唱名為《北京北角》嘅歌曲，對於歌詞有共鳴，仲特別引用入面「想返北角，如沒有船，橋樑都可繼續建」等幾句歌詞，形容呢個係北角同和富嘅人文本色，自言會做好同街坊嘅橋樑角色喎。
其實，李克勤呢首歌早前曾畀網民批評為「維穩歌」，但郭偉強都冇有怕，仲引用咗首歌嘅歌詞表明心迹，加上郭偉強之前踩單車推銷喺南區興建單車徑，又粉墨登場同職業的士司機拍短片講業界訴求等，就知郭偉強為咗增加人氣，真係可以去到好盡，唔知一班當區街坊受唔受落呢？
第一手消息請下載on.cc東網
