政壇：立會研規管龕場 鄉局發聲歎慢板

眾所周知，唔少喺新界地區嘅私營骨灰龕，都要經鄉事派同意先可以營運，部分更係鄉事直接經營。其實呢件事傾咗好耐，但由劉皇發任主席嘅新界鄉議局遲至尋日先向立法會提交意見書，話希望委員會入面有鄉議局代表。咁遲先出聲，唔通鄉議局擔心被斷米路？

政府早前公布《私營骨灰安置所條例草案》，講明一九九○年前開始營辦嘅私營骨灰龕可以豁免監管，但鄉議局似乎好不滿，話呢二十幾年有唔少新龕場落成，如果一刀切以九○年為界限，咁即係扼殺好多龕場嘅生存空間。咁講都有啲道理，但到底應該幾時設限，鄉議局話應該以今年六月為界線喎。嘩，咁咪即係差唔多全部龕場都會獲得豁免？　　　　

發牌恐變私相授受

除咗放寬豁免範圍，鄉議局仲有好多諗法，但最大想頭一定係要求政府搵鄉議局代表加入牌照委員會。點解要加入？鄉議局講得好冠冕堂皇，話鄉議局知曉新界鄉民民意，喺新界有地方性權威，如果有鄉議局代表加入牌照委員會，唔單止可以充分代表新界居民意向，仲係鄉議局應該承擔嘅法定責任喎。

其實成個牌照委員會都係得七至九人，而鄉議局都有唔少鄉紳表明有意經營骨灰龕場，如果政府邀請鄉議局加入委員會，咁唔知算唔算係自己人發牌畀自己人呢？如果真係咁，分分鐘會有利益衝突喎。