城中鏡：憂港前景 沈大師拒跳槽

沈大師解釋，之前的確有諗過同埋傾過轉工嘅，不過仲喺初步洽商階段就畀人報道咗出嚟，搞到佢老闆即刻捉佢去傾偈，後來考慮到香港依家前景唔太穩定，而且兩邊嘅條件都差唔多，於是佢決定做生不如做熟喇！

對滬港通興趣唔大

佢仲話嚟緊自己工作性質上無變，反而今次同老闆傾多咗有關於公司發展方針，大家有個共識係希望公司由以前嘅「守業型」變到「進取型」，仲定咗個目標，但暫時就唔講得咁多喎！作為訊匯生招牌嘅沈大師，加加埋埋喺訊匯做咗十四年咁耐，認真好長情。

至於講到近排好hit嘅滬港通，沈大師就話表面睇好似係一個好好投資機會，但佢作為零售投資者嚟講興趣就唔太大，加上當中變數好多，所以佢自己投資都會睇定啲先。