政壇：搞搞政：建制派慶到爆 盡擸18委會要職
立法會工務小組同人事編制兩個小組委員會負責掌管政府財政控制權，建制派本來就不容有失，但今次竟然被泛民主派突襲成功「佔領」，擺明係要同建制派開火，搞到唔少建制派議員心中有氣，質疑身為「班長」嘅建仔葉國謙收錯風，誤以為泛民只係想搶事務委員會主席職位，點知原來泛民係想搶走建制派喺財政議題上嘅生殺大權，變相廢咗建制派一半武功。
設計圖片及對白
本來每年新會期開始前夕，泛民都會同建制派開會協調來年各事務委員會嘅正副主席安排，但今年出現政改爭議，泛民單方面宣布暫停協調，仲不斷派人加入各小組委員會搶位。既然泛民無心協調，建制派亦唔會一廂情願咁被泛民「撳住搶」，決定推翻原來嘅協調結果，實行趕盡殺絕，全數搶盡十八個事務委員會嘅正副主席職位，等泛民一席都攞唔到。
陳健波勢接吳亮星棒
由於泛民今次玩到咁寸，有建制派中人建議搶埋內務委員會同財務委員會兩個副主席職位，當中財委會副主席屬意由保險界陳健波出任，為佢鋪路喺最後一年接替金融界吳亮星做財委會主席，而內會副主席之位仍在物色人選。建制派今朝會再開會商量點樣對付泛民，避免泛民嘅不合作運動得逞。
另外，立法會主席曾鈺成尋日透露，已收到議員投訴不滿喺佔領行動期間，有泛民議員縱容示威者在立法會大樓瞓覺，佢重申議員有權帶訪客進入大樓，但就會因應議員投訴，勸喻相關議員要遵守使用立法會場地嘅守則。
