政壇：霍啟剛以運動員喻佔領
佔領運動持續，除咗影響民生外，更令社會撕裂。身兼香港青年聯會主席嘅港協暨奧委會副秘書長霍啟剛，尋日接受電台訪問時就談到對佔中嘅睇法，佢以運動員在比賽場上表現作比喻，指無論運動員點對打都好，一落台都會有傾有講，即使大家喺佔中一事上各持己見，談判時都應放下敵對心態及「指罵」動作，喺合法框架內和氣傾談，已經見到曙光。
霍啟剛認為佔領運動有傾談空間就係有曙光。（資料圖片）
啟剛話連日來由電視等各渠道均收到好多有關佔中嘅訊息，但佢無帶任何顏色嘅絲帶到電台接受訪問，因為佢相信大家歸根究柢係一家人，好心痛見到有暴力場面出現，又指大家自己人鬧自己人，令佢心裏好唔舒服。佢話打人同非法集會都唔啱，但唔想再細談或責罵邊個；又話自己唔係走在潮流尖端，所以無去到「unfriend潮」或男女分手嘅地步喎。
講番運動方面，啟剛啱啱去完第十七屆仁川亞運返港，港隊刷新在亞運會贏得四十二面獎牌紀錄，更重要是今次運動員參加嘅項目和類別更廣，而體操更係首次奪牌已取得金牌成績。佢認同發展運動需要令整個社會投入運動氛圍，只要運動能成為一個家長及年輕人認同嘅職業時，就可以帶來好多其他運動產品等行業商機。
