政壇：泛民收朱古力照申報
繼舊年八月爆出有行政會議成員同立法會議員接受航空公司款待豪遊法國後，早前有多名泛民主派議員被指收取壹傳媒老闆肥佬黎政治捐款而冇申報，搞到依家個個議員變成驚弓之鳥。莫講話大筆捐款或豪華外遊款待，直頭係事無大小都一於申報咗先。我哋近日翻查議員嘅個人利益登記冊時，就發現有幾個白鴿黨議員齊齊申報早前外訪期間收到嘅朱古力。
設計圖片及對白
事緣上月立法會代表團外訪北歐八日，喺九月二十日去過參觀丹麥哥本哈根一間朱古力製造商嘅專門店，了解有關當地食品加工業嘅最新發展，其中白鴿黨劉慧卿、「一舊雲」黃碧雲同涂謹申三人返港後就申報，當日獲該公司贈價值不高於港幣五百元嘅朱古力。
創「袋住先」絕技 制度如虛設
其實涂謹申同黨友「AV仁」何俊仁舊年已經因為豪遊法國事件搞到一身蟻，點知近月涂謹申又捲入政治捐款醜聞，雖然佢否認有收過肥佬黎錢，但就似乎搞到成個黨對申報利益問題好緊張，難怪連一盒朱古力咁濕碎都急急照申報。
今次都唔係第一次有議員申報呢一類比較零碎嘅禮物，好似議員陳恒鑌咁，早兩個月前亦申報分別收到嘅五十盒杧果、四盒消腫透骨膏同一隻金馬裝飾擺設。
小心翼翼嘅仲有議員葛珮帆，佢申報咗九月期間到肯尼亞外訪嘅部分機票同住宿費用贊助，以考察非洲偷獵大象危機，以及協助中非之間建立橋樑停止購買象牙同遏止殺象運動等相關工作。
如果個個議員長期都咁自動自覺，就唔使被揭有利益衝突之後先至嚟補鑊喇。不過，泛民就政治捐款醜聞創出「袋住先」絕技，似乎申報制度都係形同虛設，咁緊張申報啲濕碎嘢做乜呢？
