城中鏡：「女版馬雲」彭蕾 加入阿里因好玩
阿里巴巴三劍俠—馬雲、蔡崇信同陸兆禧，好多人都識，其實仲有一位畀大家忽略咗，而且仲係一名女將添，就係身兼首席人才官同小微金融首席執行官嘅彭蕾。作為阿里系內金融業務嘅負責人，佢決斷嘅作風，甚至可稱之為「女版馬雲」。
阿里首席人才官彭蕾，同時負責阿里系內金融業務。（互聯網圖片）
陸兆禧同彭蕾，堪稱馬雲嘅左右護法，彭蕾負責阿里嘅人才事宜，亦負責小微金融嘅執行，由大家熟悉嘅支付寶，到籌組中嘅網商銀行都係佢嘅管轄範疇。
對待員工態度直接
今時今日彭蕾已經係馬雲嘅得力助手，甚至被外界認為係馬雲一手培育嘅接班團隊成員。不過，原來當初決定加入團隊，只係覺得同馬雲共事比較好玩，而唔係特別相信佢對互聯網同電商嘅宏圖構想。原來，馬雲提出嘅唔少業務發展構思，彭蕾同旗下嘅合作團隊，當初可能會覺得喺理性分析上唔太可行，但透過馬雲激發嘅非一般思維，好多構想卻成為事實。
喺對待員工嘅態度上，兩人分別好大，馬雲較為心軟，「他是一個非常不能去批評下屬嘅人」，傾向委婉相告，彭蕾就鍾意用直接方式，批評員工嘅錯誤。
