城中鏡：劉燊濤造人成功BB趕住逗利是
早前喺香港工業總會青年委員會成立三周年派對上，見到青委副主席Gary劉燊濤嘅太太Daphne吳奕筠小腹微凸，唔通造人成功？Gary笑不攏嘴報喜話，佢同太太努力接近三年，終於得咗，肚中塊肉係BB仔，預產期係明年二月底。Gary爸爸工總主席劉展灝夫婦都有到場，一提到就嚟有乖孫抱，劉展灝難掩開心之情，認真恭喜。
劉燊濤（右一）同太太吳奕筠（左一）造人成功，快抱孫的劉展灝夫婦（右二及三）笑不攏嘴。
陳嘉賢（右）同老公馮建輝孖住盛裝出席派對。
嚴子杰（右）即將榮升父親，身旁的史昊洺都戥佢開心。
做老竇前惡補知識
Gary自言知道造人成功後好緊張，即刻買咗好多育嬰書，仲話係佢畢業後第一次睇番書喎！佢日日急補懷孕知識，包括BB每個星期的成長變化、孕婦飲食及起居禁忌等，反而太太就冇佢咁緊張。Daphne笑笑口話自己心境好平和，經常唔記得佗緊仔，有時動作大啲，Gary就會出聲提醒，緊張過佢自己。BB嘅預產期係二月底，好接近農曆過年，Daphne就希望BB乖啲，唔好過年出世，因為大家好忙，雖然趕得切利是，但都好論盡㗎！
當晚出席嘅仲有青委名譽主席孫榮聰、青委主席兼德國寶太子女Karen陳嘉賢同老公馮建輝、仁愛堂前主席史立德囝囝史昊洺同仁濟醫院前主席嚴玉麟囝囝Jacky嚴子杰等人。原來Jacky太太Jeanly亦已懷孕多月，BB今年底即將出世。咁啱Jacky同Gary喺同一間拳館學泰拳，睇嚟打拳真係令體魄強健啲。
