政壇：搞搞政：示威者立會留宿 葉劉要求徹查
本報之前獨家踢爆，立法會議員「長毛」梁國雄濫用邀請訪客進入立會開會嘅權利，縱容佔中示威者入內開會同瞓覺，而白鴿黨「單雞」單仲偕同公文袋「袋巾傑」梁家傑嘅辦事處樓層又出現過大量示威者訪客。新民黨主席葉劉淑儀尋日去信立會主席曾鈺成，要求秘書處徹查有示威者喺立會大樓通宵留宿一事。
葉劉話有泛民議員近日以「接見訪客」為由，容許大量示威人士喺立會大樓通宵留宿，佢引述秘書長陳維安爆料話，一個半星期以來，有接近三百名身份不明嘅訪客，不停喺立會八至十樓進出同通宵逗留，懷疑佢哋入內目的同立會事務無關。
「莊嚴議事場非客棧」
根據立會規則，議員同訪客只可用立會資源進行同立會工作有關嘅活動，示威人士利用立會地方同資源籌備佔領行動，有違立會規則。葉劉話立會係一個莊嚴嘅議事場地，唔係閒雜人等可以恣意借宿嘅客棧，要求主席除要採取果斷措施驅逐留宿嘅示威者外，亦應該處分濫用立會資源嘅議員，以儆效尤。
雖然建制派連日來鬧到青筋都現埋，但有份邀請示威人士入內留宿嘅泛民議員仍然理直氣壯，覺得將立會化身為「劏房」無問題。白鴿黨「一舊雲」黃碧雲尋日繼續死撐，話議員不時都會同訪客喺立會內開會，如果啲訪客因太攰而瞓着咗，佢哋無理由要趕走人哋。咁「佔中」同立會事務有乜關係呢？佢話示威市民連日瞓街都係想爭取真普選，符合佢哋當年嘅競選政綱喎！
強辭奪理嘅仲有「AV仁」何俊仁，佢都承認依家的確多咗訪客入立會，但就話對方係因工作關係先入立會，又話大家都有認真做嘢，唔係喺度開party喎！
