政壇：神冠被狙擊主席周亞仙淡定
沽空機構不時都會唱衰民企，早排Emerson Analytics就搵咗腸衣股神冠控股嚟開拖，畀人唱，梗係唔開心啦，神冠主席周亞仙一早現身股東特別大會，終於可以親口反駁，佢淡定咁回應Emerson Analytics嘅狙擊事件，坦言「真的假不了」，仲話對方「唔敢見我」。
雖然畀人唱衰，但周亞仙保證上市約40%派息比率不變。（資料圖片）
Emerson究竟係咪唔敢見佢就唔知，淨係見神冠多番出通告逐點回應，兼真金白銀回購股份，就知神冠唔敢輕視啦。佢哋隔空駁火已經一個月，投資者好似已經冇乜負面睇法，睇神冠股價就知啦，神冠除咗上周一復牌日跌過外，已連升三個交易日，以尋日收市價計，只係比上月停牌前價位微跌1.47%，跌幅咁細，應該同公司回購行動有關。就算Emerson Analytics加碼唱衰公司，但神冠小股東似乎都唔多擔心，難怪周亞仙咁錫班股東，保證上市約40%派息比率不變。
周亞仙講到明，同Emerson Analytics素未謀面，齋睇報告內容就知對方唔熟行業運作，所以「我估佢哋都唔敢見我！」家陣公司就將事件交由律師處理。神冠股價跌幅收窄咗咁多，Emerson Analytics唔知有冇損傷呢！
