局面陷入剃刀邊緣

喺佔領中環行動持續下，泛民立法會議員呢頭揚言發起不合作運動，嗰頭就成功「佔領」咗立法會財務委員會轄下嘅工務小組同人事編制小組兩個委員會。呢兩個委員會掌管咗政府財政控制權，建制派理應不容有失，但今次竟然失守，整個局面可謂陷入剃刀邊緣，作為建制派「班長」嘅議員葉國謙肯定係協調不力，呢鑊佢真係老貓燒鬚喇！

泛民議員發起一系列針對政改諮詢嘅不合作運動，議會內嘅第一波就係攻陷掌管政府財政大權嘅工務小組同人事編制小組。民主派議員之中除咗黃毓民外，其餘二十六位都入咗兩個小組，令兩個小組人數都大比數多過建制派，可以話係成功搶灘，就連小組主席一職料泛民要爭嘅話亦可袋袋平安。其實泛民早於全國人大常委會就香港政改框架拍板後，已經表明會對政府採取不合作運動，但建制派居然毫無防範，將大權拱手讓人，平時喺立法會會議關鍵時刻都(目及)到實嘅葉國謙今次真係後知後覺、責無旁貸。

盧偉國主席位勢危

建制派喺兩個小組委員會失守，連帶主席寶座亦會失去。不過，會計界議員梁繼昌今年度已預咗接替議員葉劉淑儀出任人事編制小組主席，即係泛民唔爭都坐定粒六。反而係工務小組，原本協調下應由工程界議員WK盧偉國繼續掌舵，依家就危危乎喇。

不過，WK上年度處理「一堆一爐」時畀旁聽嘅公眾大閙會議室，搞到班議員要搬竇開會，仲喺要就「三堆一爐」表決時擺烏龍，將傳畀建制派嘅箍票短訊錯傳畀泛民，令泛民批評佢作為主席有欠公正。WK手握呢個燙手山芋分分鐘令佢失分，所以佢所屬嘅政團都冇刻意推成員入小組為WK撐場。依家小組已淪陷，更加係側側膊、唔多覺喇！

第一手消息請下載on.cc東網iPhone/iPad/Android/Windows Phone Apps