城中鏡：肥亨族長Look撐青年挑戰自我
連日以嚟，佔中示威行動堵塞咗港九多處道路，若想暢通無阻，可以到郊外行山徑。「全城街馬」組織日前為基督教正生書院舉行慈善山野賽籌款，遠離吵鬧都市，到大自然抖抖氣。商務及經濟發展局前局長「肥亨」馬時亨都響應「圖騰跑」主題山野賽，扮成印第安部落族長，寄語青年挑戰自己，無論前路是晴還是陡峭，都要坦然面對。
馬時亨（左三）、林希聖（左二）、康宏金融集團主席王利民（右三）、全城街馬創辦人張亮、梁百行（右一及二）同魏華星齊變身部落族長，為賽事主持起步禮。（受訪者提供）
逾二千名跑手浩浩蕩蕩出發，氣氛高漲。
銅管樂隊即場演奏，以悠揚樂聲為參賽者打氣。
山野賽事在麥理浩徑舉行，開跑前，肥亨與基督教正生會行政總裁林希聖、全城街馬創辦人及董事魏華星等人，朝早齊主持鳴槍儀式。逾二千一百位熱愛跑山人士，分別由西貢北潭涌同城門水塘主壩起步，以大帽山扶輪公園為終點。比賽分成五十七公里及十六公里賽事，「新手」、「老手」都玩得，一齊感受山野樂。
賽道突擊演奏打氣
正生書院都派出二十名師生參賽，為增添賽事趣味，參賽者變身「野人」，沿途充滿驚喜，大會預備各款美食包括水果宴、薯片同杯麵陣等，又安排表演者喺賽道突擊表演，奏完非洲鼓、大提琴，再奏色士風，十足開嘉年華會咁開心。驚喜仲未完，當參賽者去到終點，大會早已預備一個圖騰派對，邀請多位歌手及樂隊義演，令參賽者有雙重享樂。
今次比賽籌得嘅善款，會助正生書院進行環境改善工程。林希聖話工程將全面提升師生嘅生活環境，等佢哋繼續幫助青少年改過自新，難怪一直支持開「正生」嘅肥亨都山長水遠去支持嘞！
