政壇：搞搞政：佔中過後即查獻捐 涉醜議員走唔甩

為《蘋果》發言 未申報利益

立會休會期間，有一批機密檔案顯示肥佬黎於一二年先後向多個泛民政團同核心人物捐款合共逾四千萬元，當中包括工黨李卓人、社民連「長毛」梁國雄、公文袋梁家傑同毛孟靜、白鴿黨涂謹申五名現任立會議員，其中有人就公然喺立會大會辯論有關《捍衞新聞自由》動議時，批評特首向銀行施壓，唔好再喺《蘋果日報》落廣告，但有關議員從來都無喺發言時主動申報利益。

多個團體就醜聞去廉署報案，要求調查有關議員有否收受利益。喺各界追問下，李卓人同長毛終於承認有收過肥佬黎錢，當中李卓人更加自爆曾將巨款「袋住先」長達九個月，令人質疑兩人喺東窗事發後先將筆捐款存番入政黨戶口。廉署其後派員突擊搜查肥佬黎、其左右手Mark Simon同李卓人嘅寓所，帶走電腦同銀行帳戶資料等證物，而肥佬黎亦要親身到廉署助查，但廉署至今未有拘捕任何人。

工聯會五名議員亦去信CMI主席，要求召開會議，調查五名涉嫌收受肥佬黎政治捐款嘅現任泛民議員，有無違反立會議員申報利益規定。由於委員會多名成員唔喺香港為由，主席決定喺立會復會後舉行閉門會議調查事件。雖然依家要取消會議，但佔領行動總有結束嘅一日，只要一復會，涉及政治捐款醜聞嘅議員將避無可避。