近日社會太多紛紛擾擾,但仍無損一班準備參加智利無家者世界盃嘅香港代表隊成員意志。尋日中午烈日當空,一班球員同教練齊集九龍喇沙書院進行活動授旗儀式,正能量滿瀉。見主禮嘉賓之一嘅行政會議召集人WK林煥光精神奕奕,原來佢都好鍾意足球,但因為年輕時扭傷過足踝,後來就好少機會再踢喇!

林煥光大學扭親腳後就好少再踢波。

李宗德(右)同太太經常孖住睇球隊練習。

尋日難得有機會再畀WK接觸足球,佢似乎非常興奮,仲諗起唔少往日嘅經典集體回憶,好似好多朋友當年買報紙只係抽當中份體育版出嚟,因為全版只得足球消息。另外,以前亦不時有人喺滾熱辣嘅石地足球場度唔着鞋踢波,做赤腳大仙。不過,可惜佢大學嗰陣腳踝受過傷,後來投身社會工作之後,又好難約齊一班人,所以咪冇再踢波囉!

同場嘅港超聯球隊「和富大埔」會長李宗德係喇沙書院舊生,佢話當年對足球興趣不大,但母校每星期都有堂體育課規定要踢波,久而久之就成為習慣,佢笑言自己中學唔願郁,多數做後衞喎。但WK啱啱相反,覺得足球一定要劇烈先至好玩。

第一手消息請下載on.cc東網iPhone/iPad/Android/Windows Phone Apps