政壇：六千人抄《道德經》創紀錄
為咗弘揚道教同傳統中國文化思想，向年輕一代廣傳道教嘅哲學，逾六千一百名師生善信上周末逼爆紅磡香港體育館，喺健力士官方人員見證下，參與者齊齊埋首抄寫道家學派始創典籍《道德經》嘅經典篇章，成功打破最多人同時同地抄寫《道德經》嘅健力士世界紀錄，為道教界增添一項壯舉。
嗇色園成功創下最多人同時同地抄寫《道德經》嘅健力士世界紀錄。
學生參與抄寫《道德經》嘅經典教義。
「齊抄《道德經》活動」由嗇色園主辦，參與壯舉嘅人士包括嗇色園轄下學校嘅師生、家長、校友同善信等。不少參與學生摒棄平日常用嘅鉛筆擦膠，罕有揸起紙筆墨硯，即席揮毫抄寫《道德經》第一、二同五十九章的經典教義，又逐一細味被視為道教最高典籍嘅普世價值同人生哲理，令年輕一代對這部哲學巨著有更深認識。
