政壇：黑英擔心佔旺變暴亂
天文台前台長「黑英」林超英，除咗係環保人士，經常對有關環保事宜、例如近期就赤鱲角機場興建第三跑道影響附近海洋生態環境發聲之外，亦好關心社會，不時評論時事，對於連日嚟發生嘅佔領中環事件，政商界同唔少大學校長都出咗聲，盼叫停佔中或勸學生撒離示威場地，免生危險，黑英亦唔例外，尋日喺社交網站發聲。
設計圖片及對白
黑英喺社交網站重提香港歷史，講起八四年發生嘅的士罷駛事件，癱瘓成條彌敦道，後來仲演變成暴亂同搶掠事件，後果令人痛心，究竟所言何事呢？原來佢想講日前晚上有警察喺新填地街受集體衝擊，位置遠離「佔旺」帳篷，亦遠離「爭取一人一票運動」嘅方向和理想，象徵暴亂苗頭已現，認為旺角目前正逐漸滑向八四年暴亂嘅翻版，所以好擔心。
網民籲相信年輕人
由於黑英嘅貼文係講明向80後朋友提供資訊，自然令人聯想佢係想講畀啲集會示威者聽，結果呢番言論旋即引嚟網民長篇大論嘅批評。有網民話，知道喺旺角會有人借機搞事，但佢哋就係唔想畀啲人有機可乘，所以先留守旺角，一見到有滋事分子，就交畀警方處理，平息星星之火。另有人叫佢相信呢一代年輕人，如果示威者依家離開，連日留守就會冇晒任何價值喎。
另外，亦有網民留言話，今時今日市民嘅質素已經唔同，唔可以同三十年前相提並論，又話當年事件同目前現場睇到嘅相差太大，而且抗爭者亂中有序，又話知道黑英關心學生，但希望佢要審慎了解喎。面對網民一連串意見，黑英都不得不作出回應，但只係叫網民留意佢留言最後兩個字：「擔心」，但又隨即畀網民反駁，反映今次佔領行動議題幾咁惹火。
