SUN奇古怪：SUN潮語：【雞Show】
潮語「雞Show」係同雞隻無關，更加唔係好多雞喺度做Show。「雞Show」其實係屬於一個社運界嘅潮語。「雞」即係「弱雞」，即係軟弱無力，示弱嘅意思。「Show」就係表演。「雞Show」嘅意思係指一啲遊行示威集會，軟弱無力，完全不能達到效果，不能令政府作出半分退讓。
佔中已經爆發咗一個星期，完全未見有解決迹象，旺角、金鐘及銅鑼灣依然被大批市民佔領。只要你去過其中一區，雖然被形容為革命，但示威者都只係靜靜咁坐低，嚟聲援打氣嘅市民，都會帶嚟各式各樣嘅物資。佔領區亦有物資站、救護站及行人專用通道，秩序井然。參加留守者九成都係年輕人，喺佢哋面上，流露住青春嘅激情，對民主未來嘅期盼。金鐘通往政總嘅行人天橋，吊下一幅布，上面寫住香港人心裏幾代人所堅持嘅信念，「風雨中抱緊自由」，佢哋付出汗水、體力同精神，有家不歸，晚晚留守，為的就是香港的未來。可惜，有另一批自稱愛港人士，帶着文革式紅衞兵嘅殺氣，同江湖人士嘅架式，佢哋大部分係上咗年紀嘅維園阿伯同有紋身嘅金毛蠱惑仔，對運動肆意暴力破壞，對純潔女學生出言性騷擾，甚至非禮。到底背後是誰策動就不得而知，但係運動發展至今，絕對唔係一場「雞Show」，而係一場對立嘅全民抗爭。
好似近年民陣每年七一搞嗰啲大遊行，市民無厘神氣行到終點，聽某一兩個政客吹水兩句，然後大合唱之後散水返屋企，呢啲就被稱為「雞Show」。近十年由所謂泛民黨派及其衞星組織所籌辦嘅示威遊行，就係以「雞Show」形式進行。表面抗爭，實質維穩，力度同今次全民自發嘅佔中可謂差天共地。到底香港未來會變成點？真係天曉得。但同樣，我都希望天開眼，讓一直作惡做壞事，只顧私欲私利搞到香港臭氣熏天嘅人，能夠畀天收。祈求天父做十分鐘好人，讓他走吧！
