設計圖片及對白
環保不但要身體力行，仲要持之以恒，環境局局長黃錦星係環保先鋒，佢屋企好多年冇開過冷氣，夏天三十幾度都係自然風降溫，個女由細到大都習慣無冷氣生活，因而練出「耐熱軀體」，佢哋唔用冷氣，但會唔會扇不離身呢？
黃錦星尋日出席一個有關出征亞馬遜森林嘅活動，佢笑到四萬咁口，同在場嘅中學生分享自己十幾年前去熱帶雨林視察嘅經歷，仲話好關注全球暖化問題，仲自爆炎炎夏日，佢屋企個廳卻已有好多年無開過冷氣。
講完旅行經歷同環保生活後，佢話題一轉，話近期迷咗一套日本嘅愛情電影，佢話套戲注入唔少環保元素，講述一個男高中生因為到森林學習環保，認識咗同是高中生嘅女主角，然後擦出愛火花。
但佢半句不談戲中嘅愛情線，只話從套戲了解咗好多有關環保森林運作嘅知識，仲叫在場中學生睇吓套戲，學會「惜物減廢」喎。
第一手消息請下載on.cc東網
