政壇：議員濫用資源 立會淪「劏房」
「佔領中環」行動持續至第八日，集會人士大都捱更抵夜「瞓街」，但一眾尊貴嘅泛民主派立法會議員又點會同「庶民」一樣待遇呢，我哋日前先踢爆社民連立法會議員梁國雄（長毛）以「接見訪客」為名，長期借用立法會大樓十樓會議室，畀有需要嘅集會人士入內瞓覺或休息，其後連屬於建制派嘅七樓樓層都宣布「淪陷」，但原來有泛民議員仲借埋議員辦公室畀有需要嘅議員同義工休息添。
據了解，資訊科技界莫乃光（Charles）同會計界梁繼昌（Kenneth）都喺各自嘅議員辦公室放置咗梳化，原本只係方便自己平日做到攰就瞓梳化休息吓，但近日除咗學聯、學民思潮同佔中三子朝七晚十一咁馬拉松式借用立法會大樓開會外，泛民飯盒會都密密開會應對佔中，開會開到攰仲會向Charles或Kenneth嘅議辦「借宿一宵」添！
Charles承認有借出議辦梳化畀議員或佔中義工休息，佢解釋好多泛民議員同義工為應對佔中，連日都幾乎冇返過屋企，所以喺辦公室設「劏房」，劏開個梳化位畀大家休息，咁搞法，立會大樓唔使示威者攻陷，依家已經逐步被「佔領」喇！
