政壇：建制燒後欄 席位難保
立法會「收爐」抖暑近三個月後鐵定周三復會，意味新一立法年度委員會將會重新洗牌。不過，立法會焦點除咗應對「佔領中環」行動，戰線將蔓延至財務委員會轄下工務小組委員會及人事編制小組委員會，皆因泛民主派飯盒會二十三名議員昨日突襲成功，全數加入兩個小組委員會兼政制事務委員會，建制派火燒後欄，失守工務小組同人事編制小組兩會嘅控制權，而原本協調有序嘅個別委員會正副主席位亦生亂，好似盧偉國、梁志祥等原本坐開嘅小組主席位都分分鐘失守。
設計圖片及對白
目前最新戰況係工務小組有二十七名泛民議員加入，建制派得十九人；至於人事編制小組就更慘不忍睹，建制派只派出十四人迎戰二十六名泛民議員。據知，泛民喺上星期嘅飯盒會取得共識，一系列針對政改諮詢嘅不合作運動，除咗今次「搶灘」行動，齊腳坐穩後，仲會爭奪兩個委員會主席，重掌財政控制權。今次建制派事前聞唔到（火羅）味，捱打局面難免。
按原本協調結果，會計界梁繼昌今年度已預咗接替葉劉淑儀出任人事編制小組主席，即係泛民唔爭已坐定粒六，由建制派操盤嘅工務小組，主席一職亦將成為泛民嘅囊中物。但泛民出招，而且呢招亦唔算新，「拉布」三子陳偉業（大舊）、陳志全（慢必）同梁國雄（長毛）早已揚言暑假復會後會聯群結隊展開「四線拉布」，飯盒會成員加入戰團只係「跟風」之舉，究竟係建制派危機意識低吖？抑或係懶懶閒呢？
幸保政制事務委會
不過，據知泛民加入呢兩個小組委員會唔係志在「拉布」或衝着佔中而來，只係唔希望一連串不合作運動拖累民生相關議案，所以針對呢兩個財委會轄下小組以控制財政權。至於政制事務委員會，泛民僅以兩人之差不敵建制陣營，建制派幸保不失。
