喺928警方催淚彈清場之後，外國傳媒發明「Umbrella Revolution」出嚟形容香港呢場民主和平佔領行動。但係香港呢場佔領運動，實情同革命沾不上邊。革命係要推翻政權，但係佔領行動一直嘅訴求簡單清楚，只係要有「公民提名」嘅特首選舉同要特首辭職，並無叫推翻任何現行政治制度同解散政府。特首辭咗職，香港一樣可以運作，之前老董下台，貪曾頂上。家陣特首請辭，林鄭頂上並無問題，又何來革命可言？「Umbrella Revolution」唔理譯做甚麼，其實都係一樣，形容呢場年輕人主導，全民自發嘅民主抗爭。

佔領中環聽就聽咗年半有多，終於喺警方胡椒噴霧同87粒催淚彈下揭開序幕。但係，人算不如天算，呢個佔中並唔係發起人戴耀廷、朱耀明同陳健民所講嗰種佔中。佢哋原先話要靜坐喺街，然後等警察拉，跟住悲情地不作反抗，任由警員抬走。之後任務完成，繼續爭取，再次抗戰二十年，等民主黨之流繼續扮爭取民主繼續有工開有糧出……真正民主等到2047都依然係個夢。點知政府同警方繼續錯估形勢，928當日封鎖政總，唔畀市民去聲援學生，又唔畀人運送物資入去公民廣場，結果令到市民衝出干諾道中同告士打道，就地佔領金鐘！由佔中變成「佔鐘」，之後大家都睇到，警方施放催淚彈驅散市民，但驅不散之餘，仲愈嚟愈多人。市民只係用雨遮同毛巾保鮮紙呢啲「武器」抵抗，直至午夜過後，市民仲佔領埋銅鑼灣同旺角，「佔中」正式演變成很多很多把「雨傘」 。

我好懷疑外媒將運動定性為「革命」是何居心？佢哋明知中共最怕呢啲字眼，咁做係咪想抹黑運動?想中共出解放軍鎮壓，等佢哋有大新聞可以做？兼且幫美國佬用香港人嘅命，對付中共？不過「雨傘」那種藏於民居平平無奇，雖然無力但又能擋風遮雨，的確很「香港」，無論革誰的命運動也好，我都希望能夠成功為香港帶嚟真正嘅民主！香港加油！

第一手消息請下載on.cc東網iPhone/iPad/Android/Windows Phone Apps