政壇：搞搞政：激進泛民誓拉布拖冧創科局

雖然決議案嘅性質同其他條例草案唔同，每位議員只係得十五分鐘發言時間，但據聞激進泛民表明拖得幾耐就幾耐。人力早喺六月嗰陣已經向秘書處提交逾三十項修正案，雖然最終未能趕及喺上屆會期內討論創科局決議案，要留待新會期討論，但人力之前提交嘅多項修正案仍然有效，可以繼續提出。人力議員「慢必」陳志全話，希望到時淨係辯論同投票都要用多幾個鐘時間。

慢必：財會狂拋修正案

慢必話到時佢哋除咗會就修正案不斷發言外，仲會透過要求點算法定人數等方式拖時間，總之就唔會咁容易畀佢通關。唔單止咁，佢話創科局嘅撥款申請仍然有待財委會審批，而佢哋將會喺財委會提出大量修正案，初步估計至少拉到年底先至討論完，等政府想喺今年內成立創科局嘅大計落空，咁嘅格局，相信最頭痕嗰個會係負責嘅商務及經濟發展局局長蘇錦樑，繼續被IT業界追瘦。