喺旺角嘅示威區，尋日有大批反佔中人士同旺角居民包圍示威群眾，期間多人推撞爭執，幾近失控。人稱「星屑醫生」嘅人民力量成員歐陽英傑亦一直有留意該區情況，又喺傍晚時分喺社交網站分享咗多張該區衝突嘅相片同短片。佢見到幾位醫生在WhatsApp群組內嘅留言後，仲激動地發文話要退出有關群組同西醫工會，約十多分鐘後已累積過百人讚好。

歐陽英傑於社交網站宣布，決定退出西醫工會。（互聯網圖片）

雖然星屑醫生話唔會公開退出香港西醫工會同工會該幹事會嘅WhatsApp群組嘅詳細情形，但就將自己喺群組內嘅最後留言公開。留言主要係話佢睇見旺角有學生被毆打，心裏淌血。因為受唔住其他幾位醫生嘅說話，所以決定退出喎。佢仲話自己良心唔容許佢同嗰啲鬧學生係文革、對暴徒暴行詐睇唔到嘅人為伍。不過，佢離開工會前都不忘感謝正副主席同何醫生多年來嘅教導。

第一手消息請下載on.cc東網iPhone/iPad/Android/Windows Phone Apps