政壇：佔「鐘」威脅鼠戰中環
由學聯同學民思潮發起嘅罷課集會，演變為包括戴耀廷在內嘅「佔中三子」宣布提前佔中行動，行動已踏入第七日，但仍然未見有平息嘅迹象，日前更一度由佔「鐘」擴散番去中環，不但威脅中區經濟大動脈，持續落去仲分分鐘迫令中區大型活動需要取消或轉移陣地，包括十月十九日舉行嘅「鼠戰中環」嘉年華。據聞有中環商界透露，嘉年華叫得做「鼠戰中環」，一定唔會考慮移師其他地區，仲笑言唔通改名叫「鼠戰九龍灣」咩？
置地集團作為中區商廈「大業主」，每年都會喺中環遮打道舉行呢個別具特色嘅籌款嘉年華，九年來一直企硬選址中環舉行，除咗畀一班平日全副老西嘅金融才俊落中環主場角色扮演，攞住件玩具芝士賽跑玩障礙賽之外，仲凸顯中環作為世界商業樞紐嘅地位。據知主辦單位原本為令賽事更刺激，今年特別加入新障礙，考驗參賽者體能同智力，包括要求參賽者完成數獨遊戲、合作以巨型畫筆完成畫作甚至夾手夾腳通過一條隧道。
籌備多時決不移師
咁啱「鼠戰中環」十月同佔中撞期，一眾籌款「鼠輩」會唔會被迫同佔中示威者「決戰」中環呢？據有份籌辦嘅管理層透露，嘉年華籌備多時，如無必要絕對唔想移師陣地。不過，佔中示威者一旦當日嚟「爭場」，睇怕真係要一戰定勝負嘞！
不過，「鼠戰中環」既然作為籌款活動，往年有份落場嘅立法會議員等具分量嘅政商界巨頭，好應該諗諗計點樣收科，令呢項別具意義嘅活動唔會被迫取消或轉場，如果唔係到時參賽者唔使玩數獨增加過關難度，而係直接同佔中示威者喺中環街頭爭霸兼揚威國際喇！
