淫賤黎近排索催淚氣體索到懵咗，喺壹全霉蝕到死之際，竟然提出全體員工調薪，仲交低咗一幅紅紅黃黃、印住「加薪兩成」嘅橫額畀我，叫我召開員工大會，於席間拉開展示，大家就會明白咁話。本虫喺壹全霉咁耐，都未見過淫賤黎咁大方，果然係人之將死，其行也善，而我亦好快咁call齊班食塞米坐定定。

「咁多位，為咗同大家爭取調薪，少膽虫我同淫賤黎少來少去幾百回合，都算對得住你哋啦！」本虫乘機認叻抽水，而成班友仔一聽見加人工，先係O晒嘴，跟住掌聲雷動，有啲喜極而泣，聽聞有啲仲開心到失禁添。「虫哥萬歲！咁我哋到底加幾多人工？」本虫見大家心癢難當，即時高舉橫額報喜，點知唔夠兩秒，幾百隻鞋一齊飛埋嚟，然後全家老幼被問候……吓？加人工都要打？

「又話加人工？玩我哋？」本虫抬頭一望自己高舉嘅橫額，冇錯吖，大大隻字加薪兩成，點會係玩嘢？此時肥豪大嗌一聲：「反過嚟睇喇懵炳！」本虫一睇，「減薪兩成」？呢個淫賤黎，原來想縮皮，點我出嚟受靶，唔怪得頭先叫我一定要紅色向內黃色向外啦！少膽虫我本來想解釋清楚，但係憤怒嘅員工連底褲都掟埋出嚟，頃刻將我淹沒，睇嚟呢隻死貓我食硬喇！

第一手消息請下載on.cc東網iPhone/iPad/Android/Windows Phone Apps