城中鏡：李家仁出席酒會 潮用神棍玩自拍

話說前日喺灣仔會展舉行嘅酒會內，喺芸芸嘅政商界人士當中，有一個人特別顯眼，事關佢攞住支棍周圍行。講緊嘅唔係打功夫舞棍，亦唔係尋仇打人，否則點止好似趕喺場內示威嘅社民連立法會議員「長毛」梁國雄出去咁簡單。

棍就係棍嘞，不過係用嚟影相嘅「自拍神棍」。當時喺場內見到李家仁攞住支「自拍神棍」，同在場嘅朋友玩自拍，仲足足影咗大半個鐘咁耐，連食物及衞生局局長高永文都有試用「自拍神棍」合照，不知幾開心。李醫生呢支「自拍神棍」除咗用作影相外，仲成功吸引到唔少朋友埋去同佢研究支神棍，增進唔少友誼。