城中鏡：莊思華愛告崇恩夠孝順
模特兒莊思敏有一對孖生細妹，佢同港姐出身嘅細孖思明都活躍娛樂圈，相對對娛樂圈不感興趣嘅大孖莊思華Mona就低調得多，比較廣為人知嘅係佢同練馬師告東尼囝囝Sean告崇恩嘅一段情，Mona話：「家姐係model又做主持，妹妹依家拍劇，好多人都覺得我係最hea，其實我都唔係呢行嘅人，我唔適合做娛樂圈，我冇佢哋轉數咁快，我一直幫daddy手，搞馬來西亞嘅地產發展。」
莊思華（左）坦言自己唔適合做娛樂圈，旁為其好友劉晨芝。
Mona閒時會同男友Sean出席活動，兩人拍拖五年，感情穩定，問佢最欣賞男友乜嘢？佢甜笑話：「佢好孝順好錫屋企人，同埋佢做嘢好勤力！」二人可有結婚計劃？佢話：「結婚每個女仔都有諗，我哋拍咗拖五年，兩個家庭關係都OK，有時會一齊食飯，最重要係大家溝通相處到，一齊好開心，我哋幾乎日日見面，拍咗咁耐都唔會特別要去咩地方拍拖，大家相處好舒服。」被追問幾時結婚？佢話：「我依家二十七歲，仲可以喺工作上努力吓先，哈哈！」
劉晨芝出碟先要養聲
除咗幫父親打理生意外，Mona亦有同歌手好友劉晨芝一齊經營時裝店，對方近年更開設酒吧，Mona有時亦會捧場。
喺美國出唱片嘅歌手劉晨芝，因為打理酒吧生意而搞到聲音沙啞，坦言要休息一下先可再唱歌，佢話：「美國經理人都有叫我返去，出唱片就要遲啲，養番好把聲先，等酒吧生意穩定，我會搞其他生意，例如餐廳，始終唔可以一世做酒吧，我亦唔建議女人開酒吧，真係非人生活！」
