城中鏡：張俊勇 洪為民夜訪佔領區釋疑
由學生罷課演變到佔領中環行動已持續多日，持不同意見者形成兩派壁壘分明，除咗在街上互罵外，喺社交網站更掀起解除好友關係（Unfriend）風潮。早前香港傳藝中心喺灣仔君悅酒店舉行慈善晚宴，出席嘅中華總商會會董Thomas張俊勇出席一個慈善晚宴時呻話，最近被相識二十幾年嘅朋友Unfriend，感到唔開心，覺得社會應該互相包容，唔好因此而撕裂。
張俊勇（橫紋衫者）同洪為民（後左一）落佔領區同後生仔傾偈。
張俊勇（右一）偕太太陳慧苓（右二）出席慈善晚宴時，自爆被朋友解除好友關係。左一及二為設計師Jason及太太Caroline。
Thomas係社團活躍分子，立場當然係反佔中，因此同唔少朋友意見有分歧。不過，佢亦係某網台嘅創辦人，明白要尊重言論自由，所以就算員工罷工，佢亦盡量保持中立。佢感慨話，若社會因未能互相尊重同包容而分裂，十分不值。呢頭呻完，佢諗諗吓決定落佔領區睇睇，了解後生仔嘅心態。
感須調整青年政策
尋日凌晨大約兩點幾鐘，Thomas同香港菁英會前主席洪為民一齊去銅鑼灣同中環，期間同港大一名女學生傾過，同學仔話只係想爭取真普選，無意要特首落台。Thomas趁機問佢認唔認同自己係中國人，女同學話認同，但去到外國就會強調自己係香港人。後來Thomas又同另一名理大女同學傾，女同學話企出嚟目的係追求民主，承認因為冇讀過歷史，對中國並不熟悉。
聽完民意後，Thomas話個心舒服啲，因為唔係個個示威者都咁激進。洪為民就話，事件顯示有關方面要重新調整青年政策，要再做好啲。佢哋都讚示威現場井井有條，情況可以接受。
