佔中行動示威者仍然佔領金鐘夏慤道一帶，但立法會今午如常舉行新立法年度首次內務委員會同財務委員會會議，選出正副主席職位。內會主席篤定由做咗兩年嘅梁君彥繼續出任，而副主席選舉，泛民主派飯盒會屬意工黨Cyd何秀蘭出戰。不過，由於阿Cyd同建制派中人實在有太多牙齒印，據聞建制派講明唔想佢做副主席，如泛民一意孤行，必要時會派出保險界陳健波出選攔截。

設計圖片及對白

根據建制派同泛民之間嘅不成文規定，內會主席一向由建制派出任，泛民議員只可以出任副主席一職。阿Cyd本來喺兩年前已經表明想做內會副主席，但由於建制派一面倒反對，阿Cyd當時只好讓路，等兩年之後再算。可惜如今事隔兩年，阿Cyd仍然得唔到建制派信任，如果佢堅持出選內會副主席，建制派就會啟動後備方案，搵人提名陳健波做內會副主席。

若投票泛民蝕底

雖然陳健波係建制派一分子，有違協議中內會副主席一職必須要由泛民議員出任嘅規定，但有建制派中人就話，既然泛民寧可搵阿Cyd出來選都唔肯換人，又話要同佢哋開戰，佢哋亦唔會咁容易就範。況且建制派議員多過泛民，如果最後真係要投票定輸贏，一定係泛民蝕底，所以尋晚泛民開完飯盒會後，就決定壯士斷臂，唔畀阿Cyd選內會副主席。

至於財委會方面，由於建制派一早已搵定由飲食界張宇人出任，加上劉慧卿之前講過今年未必會再爭主席一職，預計張宇人可以喺無對手下自動當選。建制派話會按照規矩畀卿姐出任副主席，之但係如果阿Cyd唔選內會而走去選財委會副主席，唔知建制派又會點樣應對呢？

第一手消息請下載on.cc東網iPhone/iPad/Android/Windows Phone Apps