為咗源頭減廢而推出嘅垃圾徵費試點計劃失敗，最大嘅敗因原來出於環境保護署嘅背心式專用垃圾袋設計欠佳，袋口過窄成日「漏汁」兼有跌出垃圾等問題，搞到試點嘅居民參與率偏低。署長王倩儀最近補鑊改推新設計嘅風琴式專用袋，點知又變成焗街坊買貴價袋嘅錯誤措施，簡直係「一條龍式步步皆錯」，令人懷疑政府係咪真心想搞減廢，定係有姿勢冇實際，求其整啲袋出嚟敷衍市民就算？唔該王倩儀拿拿聲戙高床板諗掂佢，唔好「惠民」變「擾民」。
