政壇：長毛將立會變賓館

話說佔領中環行動連日佔據政府總部同立法會大樓外嘅夏慤道同添美道，部分人士更加喺馬路上搭建帳篷或席地而睡，暫時未有撤退嘅迹象。為咗呼籲示威者繼續留守，社民連嘅立法會議員「長毛」梁國雄除咗兩度下跪，請求示威者唔好「鬆人」外，有知情人士仲投訴，懷疑長毛濫用立法會資源，容許示威人士進入立法會大樓瞓覺休息。

會議室內放帆布床

據了解，由於大批集會示威人士無覺好瞓，長毛連日就用「接見訪客」為由向秘書處借用立法會大樓十樓嘅會議室，等示威人士可以得閒入內抖抖。記者前兩日上十樓視察，發現大門被人用硬物阻住無法閂埋，會議室門口仲貼住張告示，上面寫有「義工休息區，內有人睡覺，請保持安靜」等字眼。

推門入去會議室望吓，發現內裏漆黑一片，依稀見到放有兩張帆布床，仲有疑似示威者瞓緊覺，長毛真係當自己攞正牌畀人「屈蛇」咁樣喎。

反國教一役有前科

點解搞到立法會好似冇掩雞籠咁呢？仲記得兩年前反對國民教育一役，長毛已經試過帶學民思潮成員上五樓沖涼，事後遭立法會行政管理委員會去信警告。如果今次長毛又濫用立法會資源明益自己友，唔知行管會今次又會點處理呢？