化驗報告失蹤 醫局病入膏肓

成件事係咁嘅，醫管局資訊科技部最近例行檢查，赫然發現屯門醫院內科及老人科專科門診舊年十二月更新系統設定出錯，一直都無按程序自動列印病人化驗病理報告，追查之下，發現有八百多份報告「被失蹤」，而其中十份仲係從未被閱覽，簡直離晒大譜。猶幸當局重新檢視有關化驗報告後，證實全部均非確診惡性癌細胞，影響冇咁嚴重，如果係癌症病人被耽誤診治十個月嘅話，神仙都難救喇。

衰開有條路，本港公共醫療系統千瘡百孔，家陣唔止黃綠醫官心盲腦殘，連電腦系統都黐總掣，時不時出事，唔通真係物似主人形？今次事件唔係孤立個案，而係揭露公立醫院管理混亂嘅冰山一角咋。根據正常程序，為病人診症有三重把關，包括資訊系統每次自動列印病人報告畀專科門診、醫生每次診症都需要開啟病人電子病歷紀錄參閱、專科門診每星期列印一次所有病人報告摘要作覆核，而家陣居然病理報告不翼而飛十個月都無人發現，即係有人馬虎失職，無跟足程序辦事喇。正所謂，人命大過天，需要做組織化驗嘅病人，絕大部分都係懷疑癌症個案，延誤診治後果可大可小，公立醫院敷衍了事，求求其其，疏忽職守成咁，根本就係搵病人性命健康較飛。

所以話，入公立醫院求診同搵命博冇乜分別嘅咋，一個唔好彩嘅話，何止病理報告被失蹤，分分鐘被人打錯針、派錯藥、輸錯血、斷錯症、開錯刀，死咗都唔知發生乜嘢事。呢，日前之嘛，瑪嘉烈醫院就發生咗一宗奪命醫療事故，一名血癌男病人接受化療後，因為醫院職員派漏覆診紙而延誤病情，之後頭暈不適入院，而入院後四小時都無被安排血液化驗及腦掃描，最後陷入昏迷，搶救三日終告不治。

唉，講起都令人欷歔。曾幾何時，香港醫療水平喺亞洲首屈一指，令港人引以為傲，點知時移勢易，今日嘅公立醫院紛紛淪為閻王殿，有關嘅「醫療病變組織」幾時至可以切除呢？今屆政府開口埋口「穩中求變，適度有為」，究竟幾時至肯認認真真為醫管局進行全身檢查吖？如果已經做咗，千祈唔好唔見咗份病理報告，搞到延誤救治吖，叮！